Deteníos dos homes por furtu siguíu de cobre nes víes de tren de Siero y Uviéu   

Los lladrones buscaben a terceres persones ensin antecedentes pa llevar el material a los centros de reciclaxe

La Guardia Civil d'Asturies prindó dos persones como presuntos autores d'un delitu siguíu de furtu de material de cobre na vía de tren que va ente Asturies y Lleón y que llevó al Alministrador d'Infraestructures Ferroviaries (ADIF) a presentar siete denuncies na primer quincena de payares.

Según informa la Guardia Civil, nes denuncies puestes nel puestu d’Armunia (Lleón) afítase’l robu d'un total de nueve xuntes inductives, y los daños causaos polos cortes del cable de retornu en dellos tramos de víes de tren nos conceyos de Siero y Uviéu.

Estes xuntes inductives tienen un altu conteníu en cobre pol bobináu y les pletines qu’hai nel so interior y col so robu prodúcense retrasos na circulación de trenes tanto de pasaxeros como de mercancíes y, inclusive en dalgún casu, a la suspensión de la circulación.

Dos de les bobines robaes fueron alcontraes en centros xestores de residuos d'Asturies, anque dende ADIF nun se recoyó pola mala traza que presentaben y nun ser aprovechables.

Tres les investigaciones llevaes alantre polos axentes, identificaron al supuestu vendedor, que nun cuntaba con antecedentes policiales, y al so acompañante, que sí los tenía por fechos similares, lo que foi perimportante.

Al paecer, los autores materiales del robu solíen buscar a terceres persones carentes d'antecedentes pa llevar el material a los centros de reciclaxe pa la venta, pasando asina desapercibíos tanto pal comprador como pa los investigadores.